Size sargydym
Size sargydym
Ownuk hossarlykdan dyndaryň meni.
Çybyklary gyradeň däl daragtyň,
Eselsem, kötekläp syndaryň meni.
Ýaşamda ýaşaýyn adam şekilli,
Wyždanyňa görä gezmek ýakymly,
Boljak bolsam, öz-özümden akylly,
Gaýadan başaşak inderiň meni.
Eger düýä münüp hataba buksam,
Çemçeläp ýygnanmy, çanaklap döksem,
Il-günüme gyýa göz bilen baksam,
It alan sanaja dönderiň meni.
Yhlasym, höwesim şygyrlarymda,
Şolara siňendir maňlaý derim-de.
Sizem medet berip, gerek ýerinde
Ýyly mähriňizden gandaryň meni.
Bu ejiz ýüregim sizi küýseýär,
Guş dek uçup, boz jeren dek tasaýar,
Gülden-güle gonup, yşky küýseýär,
Sawçy dek öýlere gönderiň meni.
Ýylgaý Durdyýew. Goşgular
