Watanym meniň
Watanym meniň
Ýetmiş ýaş içinde kyrk ýyl aýralyk
Ony ýat illerde sergezdan etdi.
Keseki ýurdyň gije-gündüzi
Bal hem bolsa, gara bagryn gan etdi.
Özge iliň bir gözelniň sögüsi
Öz iliniň mährin berip bilmedi.
Ýüzi güne ýanan türkmen gyzynyň
Bakyşynyň ýaryça-da bolmady.
Ogul söýdi,gyz erkeläp ulaltdy,
Ýassykdaşy ýat bolsa-da, ýakyndy.
Söýgüden dolydy «ezizim» sözi,
Kalba siňen mährin unutmak kyndy.
Agzybir maşgalaň guwanç-şatlygy
Teselli berse-de onuň göwnüne,
Ata watan-ene toprak küýsegi
Özüne çekýärdi günüň-gününe.
Ýaş ýetmişe bardy,bir gün dillendi
Maşgalaň jem wagty,daň säher çagy.
«Ogullarym, bu ýurt maňa kezeki,
Size bolsa, gözleň garasy-agy.
Meniň ilim, ho:l, kartanyň ýüzünde
Gyralary ýaşyl,
sary zolakdyr.
Otuz ýaşa çenli basan yzlarym
Şol sary reňke siňip galypdyr.
Nesibe çekipdir, bu ile geldim,
Kyrk ýyl togap etdim halal duzuny.
Mähriban eneňiz hemrahym boldy,
Munda gördim sizi; ogul-gyzymy.
Siz meniň maşgalam-mukaddes öýüm,
Ýüregimden geçip duran ganym siz.
Emma,maňa kyn bolup dur ýaşamak,
Ata watanymsyz-mähribanymsyz.
Rugsat berseňiz gündogar sary
Ýol alsam diýýärin türkmen ilime.
Töweregniň gözelligne syn edip,
Bir nazar aýlasam atyz-çiline».
Öýünde gojanyň sözi hökümdi,
Hormaty ulydy maşgalasynda.
( Yzy bilinýärdi gara zähmetiň,
Maňlaýdaky ýygyrt-ýygyrt gasynda).
Maşgala bir adam ýaly dillendi:
«Bizem ýanyň bilen bile gideris,
Maşgalabaşynyň basan yzyny,
Ömrümiz ötýänçä togap ederis».
Goja ahmyr oýly başyn dikledi,
«Men gitsem, dolanyp, gaýdyp gelmerin.
Özümiň ýurt zaryn çekenim besdir,
Sizem ilden aýra salyp bilmerin.
Ogullarym, ata watan zaryny
Kalbyny ýaralap göteren biler.
Aýralyk sebäpli sanjap ýüregi,
Çep gursagna elin ýetiren biler.
Siziň watanyňyz, ine, şu toprak,
Şu ýere damandyr göbek ganyňyz.
Men watana barýan, аlada etmäň,
Ýerde bolsun siziň ýasy ýanyňyz.
Meni göresiňiz gelen mahaly,
Eneňiziň gözlerine syn ediň.
Meňki diýip biliň onuň sözlerin,
Sylagyňyz-hormatyňyz kän ediň».
Gönükdirip didelerniň nuryny,
Goja ogullarna dikdi nazaryn.
Agtyklar boýuna~boýuna bökdi,
Göýä,balyjagy Bahry~hazaryň.
Maşgalasy, dost~ýarlary jem bolup,
Uçar meýdanyna süýşüp geldiler.
» Indi ýene didarlaşmak-görüşmek
Nesip edermikä?» diýşip geldiler.
Gulaç ýaýyp demir ganat «Simrug guş»,
Maňlaýyny gündogara öwürdi.
Ötüp nije derýalardan, daglardan,
Türkmen topragyna daban degirdi.
Uçar gapysyny açan badyna
Gojaň ýüzün çaýdy watan şemaly.
Gözlerine surat bolup ýapyşdy,
Töweregiň manzarasy~jemaly.
Dyza çöküp,togap etdi zemini,
Möňňürüp,möňňürüp sesli aglady.
Ýaş-ýeleňler geň galyşyp durdylar,
Ýaşulylar ahwalyny aňlady.
Watan zaryn çeken gojaň ruhun
Watan öz süňňüne çekip başlady.
Wysal boldy aýralygyň ahyry,
Kalby eräp, ýere akyp başlady.
Birden süýşüp gelen garaja bulut
Seçeledi ak ýagyşyň dänesin.
Tolgunmadan ýaňa jan beren gojaň,
Ata watan tämizledi synasyn.
Şyhymyrat ABDULLAÝEW.
2017-ýyl Goşgular
