Uruş ýyllarynyň salam hatlary

Uruş ýyllarynyň salam hatlary URUŞ ÝYLLARYNYŇ SALAM HATLARY

Şol gazaply günler ýaly agrasdy,
Uruş ýyllarynyň salam hatlary.
Olar—Dürli ejäň ýalňyz hossary,
Uruş ýyllarynyň salam hatlary.

Nämüçindir, mydam eglenip gelen,
Söweş ýollarynda emgenip gelen.
Umyt bolup gaýdan, em bolup gelen,
Uruş ýyllarynyň salam hatlary.

Hersin Dürli eje ýekeme-ýeke,
Depderiň içinde saklaýar eken.
Bileje şatlanyp, deň hasrat çeken,
Uruş ýyllarynyň salam hatlary.

Üçburç bukjalar… Dört-bäş kelamly—
“Garaşyň! Bararys sowup belany!”.
Gysgadyr esgeriň ukusy ýaly,
Uruş ýyllarynyň salam hatlary.

Günleri-aýlary ýyllara gatlap,
Janserek bolandyr arada gatnap.
…Her biri bir Ykbal, ýöne bir hat däl,
Uruş ýyllarynyň salam hatlary! Goşgular