Toý sähedi bellendi / ýumoreska
Toý sähedi bellendi / ýumoreska
TOÝ SÄHEDI BELLENDI
— A gyz, bütüki ''Akyşyň sakgalyny'' çyzaýaly-da.
— Ýaňy ''Jemalyň burnuny'' aýyrdym, besdir şol.
— Beý diýmesene, gyz, men-ä ýeke o däl, ''Atabaýyň dişini'' aýraýsaň diýjek bolup otyryn.
— Siz-ä ýüz berilse, halys ýüzin düşer edýäňiz muny.
Ýigit tarapynyň wekilleri aýal naýynjar gürledi:
— Oňuşaýaly-da, guda jan.
— Ýeri bolýa-la, ''guda jan, guda jan'' diýýäň-de ugymy ýekeläýýaň-dä. Şol ýaňky diýen iki haladyň üstünem çyzsaň çyz welin, aşak ýüzündäki ''Jimi-jimi'' bilen işiň bolmasyn…
Gudaçylyk gyzdy. Spisokdaky salgyt salnan halatlaryň üstünden bir çyzyldy, bir ýazyldy. Ahyrynam iki tarap ylalaşyga geldim etdi. Indiki nobat pulunyňkydy.
— Ylaýjak on bäş müň.
— Goýaweri, guda jan, bäş ýagşy, on ýagşy, soňky bäşiň nämedi?!
— On müňä öz salgydymyz, bäş müňem diplom haky.
— Köp bolmaýamy, guda jan.
— Bäş ýyllap okatdyk, her ýylyna müňje manat, onsoň niresi köp bolýarmyşyn onuň…
— Onyňam dogrudyr welin, gel, şony üç edäýeli-le.
— Aýdýanyň näme gyz. Iki sany üç müň-ä giriş ekzamenine-de gitdi şonuň…
Çekeleşik eslije wagta çenli dowam etdi. Iň soňunda gyz tarapy diplom hakynyň ujundan müň manadyny aýyrmaly boldy. Şondan soň toýuň sähedini öňdäki däl-de, ondan aňyrdaky ýekşenbe gününe bellediler.
Arslan MÄTEROW.
"OWADAN" žurnaly, 1992 ý.
Satiriki hekaýalar
