Tebigata
Tebigata
Talap hazynañy, çürtüp sonaryñ,
Saña ýagyñ gözi bilen esedip,
Kast eden kişinem it-guşa bermän
Goýnuñda duwlaýañ haram jesedin.
Erniñ parawuzly, agzyñ jähekli,
Uýadyñ ýitirmän, syrman ýaşmagyñ,
Daş bilen urany aş bilen urup
Ýaşap ýörsüñ, ownuklykdan daşda sen.
* * *
Şeýtana ders beren garry dünýede,
Kimse malyñ, kim mertebäñ gedasy
Guýruk bulan gaýyñ, ýyly ketekde,
Gurdyñ ogly buýsanjynyñ pidasy.
Kümüş kapasada sürpek sözleri,
Tütjar toty ýañkalap ýör ýaltanman.
Sazy süññüm söken sähraýy bilbil,
Çöp çatmada ýanyp gitdi ýalkanman.
Muhammetöwez ARRYKOW. Goşgular
