Şol gün diýsene!..
Şol gün diýsene!..
“Ömre deň ahwal”
Şahyr Kakamyrat Rejebowyň gazetde çap edilen ilkinji goşgusyna bagyşlap ýazan goşgusynyň ady
Kakamyrat goşgusynyň adyny
Ýerden ýa asmandan tapman ekeni.
Dogurdanam, ilki goşgyň gazetde
Çykmasy “ömre deň ahwal” ekeni.
Ýatlamaly bolsam, geçen ýolumyň
Bagtly günlerini ýekänme-ýekän,
Ýatlaryn şol günem,
Ah, şol güni men
Egnimde baş durka unudarmykam?!
Gazetde goşgusy çykan oglan-da!
Ellerim gazetli çapýan ikiýan.
“Şu diňlär-ow!” diýenlermiň ýanynda
Diňlese-de ýa-da diňlemese-de
Okaýan.
Bagtyma olaram öwen bolýalar,
Käbiri-hä, hakyt, çykarýar arşa.
Gitdigimçe meleň alýaryn menem,
Eselmän boljakmy öwülip dursaň?!
Hawa, öwýärdiler ertir dünýäde
Bardygy-da bilinmejek goşgyny.
Çyny bilen gutlaýardy hemmeler,
Ýaşajyk “Halyly”,
Körpe “Puşkini”.
Ýylgyryp ýatlaýan şol güni mydam,
Indi-indiler boluşymdan utanýan.
…Goşguly dünýämde ýöne häzirem
Şol sada goşgyny öňe tutunýan… Goşgular
