Meniň kelläm

MENIÑ KELLÄM

Diňlän bolup sapagy,
Otursam-da men ümsüm,
Kelläm daşarda meniň —
Daşarda ähli ünsüm.

Sebäbi meniň partam
Ýanaşyk dur äpişgä.
…Syn edýärin itlerden
Gaçyp barýan pişige.

Pişik derrew dyrmaşdy
Tapyp belent agajy.
Itler aşakda galdy,
Ýok itleriň alajy.

"Düşmän oňsaň bor!" diýşip,
Itler haýbat atdylar.
Garaşmakdan irigip,
Öz ugruna gitdiler.

Hanha doňuz-mekejin
Hapa suwa girip ýör.
Ýalpyldadyp kekejin
Horazlar gum dörüp ýör…

Diňlän bolup sapagy
Otursam-da men ümsüm,
Kelläm daşarda meniň —
Daşarda ähli ünsüm.

Kellämiň bu endigi —
Gezmäge gidendigin,
Mugallym derrew duýýar:
— Özüň klasda welin,
Kelläň nirede?! — diýýär.

Çagalar edebiýaty