Magtymgulynyň ýadygärliginiň öňünde
Magtymgulynyň ýadygärliginiň öňünde
Seredip dur bägülleriň içinden
Poeziýanyň ägirdi.
Öňünde ýigit bar, gyz bar, şahyr bar
Hemem şägirdi.
şahyr diýdi: «Bu gün ne gözel dünýe, —
Gözel bar, güller bar, şägirt-dowam bar.
Iň gowy goşgymy şu gün ýazmasam,
Şahyrlygma Pyragydan zowal bar».
Bägül diýdi: «Bu gün ne gözel dünýe
Goşgy bar, gözel bar, hem ýaş juwan bar.
Iň gowy müşkümi şu gün saçmasam,
Bägül bolup döränime pygan bar».
Ýigit diýdi: «Bu gün ne gözel dünýe,
Şahyr bar, güller bar, ýene…
biri bar.
Şol gyza yşgymy şu gün açmasam,
ýüregimiň egsilmejek zary bar».
Şägirt bolsa diýdi: «Hol barýan gyzlar,
«Ýaşkom» gazetini alýarmykalar.
Şu günki sanynda çykan goşgulaň,
Meniňkidigini bilýärmikäler?»
Nurmuhammet ÝUSUBOW.
«Edebiýat we sungat» gazeti, 31.05.1985 ý. Goşgular
