Isgender tämiz diýarda
Isgender tämiz diýarda
«Isgenderiñ pähim diwany» eserinden
Isgender dünýäni basyp almakçy,
Ýagşy-ýaman ~ barça zady bilmekçi.
Oñ ýörişi şöhratlydy hem kyndy,
Bir gün bir diýaryñ çetinden indi.
Ol bir täsin diýarydy ynsanyñ,
Ady-sory ýokdy şa bilen hanyñ.
Onda ne baý bardy, ne garyp bende,
Adamlaryñ bary bir jan, bir tendi.
Gowuşýardy ýerne halkyñ azaby,
Bol-telki durmuşyñ bar öz hasaby.
Tämizlikden gurlandy oñ binýady,
Bilmezdi halaýyk jeñ diýen zady.
Her kesiñ howlusy bakjaly-bagly,
Işikler hiç haçan bolmaýar bagly.
Her öýüñ deñinde bardy ýerzemin,
Ýerzemin ~ merhumy ýerlemek üçin.
Haýran etdi Isgenderi bu ahwal,
Diýarlyñ birine berdi ol sowal:
«Günüñiz gül ýaly. Ýöne, nämüçin
Dirikäñiz gurnupsyñyz ýerzemin?»
Şeýle jogap berdi oña diýarly:
«Ýaşamaly her kes namysly-arly.
Ýaşamaly ahyr öljegin bilip,
Ýaşamaly ile hemsaýa bolup.
Göräýmäge, o ýer bir gün, lal ýaly,
Paýhasy bar üçin manydan doly.
Diýýär: «Sen ölmeli, ömür bäş günlük,
Ýagşylyk et. Ahyr ýuwdar şol tümlük».
Şa sorady: «Ýagşy. Aýt sen, nämeden,
Derweze, işikler açyk dur mydam?»
Baýlaryñ, garyplañ bolmaýşy ýaly,
Bizde ogry-da ýok ~ diýdi diýarly. ~
Des-deñdir hemmäniñ gün-güzerany,
Topragy — ilimiñ melhem-dermany.
Däne sepseñ, biriñ müñ bolup geler,
Ýurduma Ýokarky nazaryn salar».
Şa sorady: «Neçüýn zerur çagynda
Şemşirlerñiz çykman galdy gynynda?
Halka biri häkim bolmaly dälmi?
Il-gün oña gulak salmaly dälmi?
Bolýan däldir bü-ýä düşüner ýaly».
Şeýle jogap berdi oña diýarly:
«Bidüzgünlik ýokdur meniñ ilimde!
Derkar däldir bize şer-de, zalym-da!»
«Ýogsa-da, nämüçin baýyñyz ýog-a?»
Diýip, ýene-de bir sowal berdi şa.
«Şahym! — diýdi göwni açyk diýarly ~
~ Halallyk kowmuna baýlyk zyýanly.
Altyn, kümşe gyzmak zäherdir, zäher,
Husytlyk ~ dünýäde bar şerden beter.
Şeýle ynam bizde, şükür Ýokarka,
Dowam edip gelýär arkama-arka.
Pederleriñ ekip giden baglaryn
Eý görýäris, tirip alma, narlaryn».
Añk bolup şa duşan bu ahwalyna,
Düşürdi leşgerin gelen ýoluna.
Terjime eden: Dañatar BERDIÝEW. Goşgular
