Hafyz Şirazly

Hafyz Şirazly HAFYZ ŞIRAZLY

Dünýäň depesinde ýaşap ötdi ol,
Hak yşgynda gözlerini ýaş etdi.
Hywa gözeliniň birje halyna,
Samarkandy, Buharany bagş etdi.

Hökmi ýöräp duran şa dälem bolsa,
Ondan ejiz geldi zalym Teýmirleň.
Dünýäň deň ýaryny basyp alsa-da,
Şahyr mutyg däldi onuň emrine.

Bu jahany gözellere bagş edip,
Şeýdip gedaý galdy Hafyz Şirazy.
Bir garyp jinde-de ötenem bolsa,
Şahyr ykbalyndan razydy-razy.

Şalar teňňesini ölçäp berýärkä,
Ol tutuş şäheri joşup bilýärdi.
Şalar ýaly çäkli däldi örüsi,
Ol bütin dünýäde ýaşap bilýärdi.

Beýle jomartlygy özünden başga,
Edip biljek ýokdy meger jahanda.
Aý,hawa-da Hafyz Şirazy bolsaň,
Şeýdip ýaşamasaň nämetjek munda.

Şöhrat ABDYÝEW. Goşgular