* * * - Gurbandurdy Orazow

Gowşurylman solup giden
Güller giripdir düýşüme.
Bagt deýin tiz gelip-giden
Günler giripdir düýşüme.

Şeýledir yşkyň kitaby:
Ýary ahmyr, ýary agy,
Mukaddes söýgüň mähraby–
Münber giripdir düýşüme.

Ma:ýyl-ma:ýyl, assa-assa
Ýöräp barýas ýere basma:n,
Älemgoşar, mawy asman –
Gümmez giripdir düýşüme.

Çeçekleri tiken-tiken,
Çyn söýgi aýralyk eken!
Egnime ömürlik çöken
Günler giripdir düýşüme.

Şapak bolup lowurdan şam –
Köňlüme – gam, ömrüme – şan,
Hyýalda haly perişan
Dilber giripdir düýşüme.