Goşga siñdirilen degişmeler

Goşga siñdirilen degişmeler GOŞGA SIŇDIRILEN DEGIŞMELER…

— Goňşy, goýunlarňy boşatmaweri,
Torç edipdir sübseligmi, darymy.
— Bolýar, menem indi, girse bagyma,
Gyraryn dermanlap, ähli aryňy.

— Ýitiren zynjyrňy gözleýäň welin, 
Gözüň-ä seň agyl bilen dölede?
— Wah, şol ýiten zynjyrymyň ujunda
Bolmaly bakylan semiz göle-de.

— Eşegiň-ä ýorga eken, bir nas al,
Gökläli, gök ýere gaçýanam bolsa.
— Wah, sakgaldaş, kädim öýde galypdyr,
Nas-a ýok, şu eşek uçýanam bolsa.

— Gawunma giripdir eşegiň, goňşy,
Awundyryn, daňjak bolsaň, daň indi.
— A-how, giren bolsa, kowup goýbärler,
Boljakmy sen eşek bilen deň indi?!

— Keselhana adam bary üýşüpdir,
Känmidi oň garyndaşy, ýeňňesi?!
— Ondan dosty, garyndaşy bizar-la, 
Algydarlar — bu duranlaň hemmesi.

— Ketekden ýumurtga almasyn ogluň,
Tabşyr, goňşy, çal dulugna bolmasa.
— Wah, bilýän-le, gaty betdir Çaryşkam,
Kaýyl bolaý, towuklarňy almasa.

— Gazanjyňy ýerliklije sowarlar,
Pul diýen zat hazzyklyga baranok.
— Onyň dogry, goňşy, ýöne men senden
Karz pul soraýan, akyl soramok.

— Bazarda sataşdym dellal goňşyňa,
Ýa ol ähli dellallaryň pirimi?!
— Görüşeňde ahmal bolsaň, bildirmän,
Alyp galar bäş barmagyň birini.

— Bol, how, gardaş, “Kepderini çalyp ber,
Düşünemok “Keçpelege”, “Geline”.
— Üç sapar-a çaldym, ýa indi ony
Pasyrdadyp bereýinmi eliňe?

— A-how, eşdip goýuň, alýas, berýäs-de,
Undaýýas biz käte hasaplaşmagy.
Kimiň şu bendede algysy bolsa,
Beýläk baran wagty hasaplaşmaly.

— Çagalaryň bilen iýjekmi, goňşy,
Ýa az-owlak satjagammy naryňdan?
— A-how, hi, çaga-da nar dözüp bormy,
Geçýärkä bazarda onki ýarymdan?!

Atajan ANNABERDI Goşgular

Makalany PDF görnüşde ýükle