Garynjanyñ mesligi / basnýa
Garynjanyñ mesligi / basnýa
Siñek maslygyna duşan garynja,
Ysyrganyp diýdi: — Ynha bir olja —
— Muny bärden alyp barsam dessine,
Garynjalar eñer meniñ üstüme.
Uzakly gün selpäp, tapaýsañ düwür,
Onuñam daşyndan bir giden gowur —
Diýip, gorky etdi biri görerden,
Garynja bosguny çozup gelerden.
Işdäsi açyldy, doýdy bir kemsiz,
Boluberdi şunda gaýgysyz-gamsyz.
Bireýýäm unutdy, ýoldaşlaryny,
Köneje hinini, deñ-duşlaryny.
Çola ýerde çenden aşa semredi,
Kämahallar ony-muny samrady.
Çem gelene agyz urup başlady,
Ýatan guşuñ aýagyndan dişledi.
Çalja torgaý birden tisginip gitdi,
Garynjany görüp, ýalmap-ýuwutdy.
Şeýdip pida boldy aşa meslige,
Ömrüni çalyşyp ýeke maslyga.
* * *
Aşa meslik başa bela getirer,
Päli peslik başyñ göge ýetirer.
Nurgeldi ÇAKANOW. Goşgular
