Eşekler nämüçin eşek?..
Eşekler nämüçin eşek?..
Jogap tapmasañyz tebigata göz aýlañ…
Tebigat size hakykaty aýdyp berer…
Tebigat prinsipialdyr… Dürsdür…
Jöwen ekeniñizde asla hyýar çykaryp bermez…
* * *
Keýikler… arylar… balyklar…
Möjeg-ä möjekdir, guşam — guş…
Näme bolup doglan bolsañ — şo bolubam ýaşarsyñ…
Ne-hä belkanyñ tüýsünde guş bar, ne-de möjegiñ tüýsünde şagal…
* * *
Tebigat size asla ýalan sözlemeýär…
Oduñ ýakýandygyny, garyñ doñdurýandygyny, tikeniñ batýandygyny, batgalygyñ ýuwdýandygyny, ýagyşyñ ezýändigini bilýäñiz…
Tebigat mertdir…
* * *
Tebigat akyllydyr…
Romaşka sowukda güllemeýär…
Derekler baharyñ gelerine garaşýar…
Ne balyklar gury ýerde gezjek bolýar, ne garlawaçlar gyşda demirgazyga, ne-de leglek yssy howada günorta uçýar…
Durnalar iñ akyllylarynyñ yzyna düzülip, belki-de, heniz görmedik belent-belent daglaryny aşyp, jülgeleri, deñizleri geçip, adam oglunyñ kompassyz, kartasyz tapyp bilmejek ýaşyl ýaýlalaryny ýalñyşman-zat etmän tapýarlar… Iñ öñdäki akylly durnanyñ yzy bilen…
Tebigatda hiç bir janly-jandar iñ akylsyzynyñ yzyna düşmeýär…
* * *
Tebigat barlyşyksyzdyr…
Ne derýalar daglara ýeñilýär, ne agaçlar şemala…
Ýyldyrym çakmalymy — çakýar…
Ýer ýarylmalymy — ýarylýar…
Harasat gopmalymy — gopýar…
* * *
Tebigatda güýçli bolmagyñ buýsanjy bar…
Başy garly dag, ýolbars, bürgüt…
Ýa bir delfin, ýa bir çekirtge…
Garynja-da öz güýjüni erkinliginden alýar…
* * *
«Hany, eşekler bu ýazgynyñ niresinde?» diýmegiñiz mümkin…
Menem şony diýýän-dä…
Hany munuñ eşegi?..
Bekir JOŞKUN.
«SÖZCÜ» gazeti, 13.07.2014 ý. Oýlanmalar
