Dileg
Dileg
Ýaradanym, menem dileg edeýin,
Töhmet belasyndan özüň saklawer.
Namartlaryň, göripleriň odunda
Hilä düşen mert ärleri ýakmawer.
Dost berewer, sadalardan, beglerden,
Ýalandan dostuny hormatlamasyn.
Oslanmadyk wagtda ýeňseden urup,
Duşman berseň, olam namartlamasyn.
Ber, medet bendäňe, başyn çarara,
Minnetli aşlardan hergiz doýurma.
Binamyslyk belasyndan sakla, ki,
Abraý atly baýlygyňdan aýyrma.
Är başyn gowgaly etseň-de, Allam,
Ejizlikden goýma gözi ýaşlara.
Beren ömrüň bir gün alarsyň, ýöne
Juwanlykda ölüm salma başlara.
1997 ý.
Geldimyrat SEÝIDOW.
“Adalat” gazeti, 08.10.1999 ý. Goşgular
