Derdi gördüm

Derdi gördüm DERDI GÖRDÜM

Habar alsaň, Nazar molla:
Dert üstüne derdi gördüm;
Ili göçüp, döwri sowlan
Ýas baglaýan ýurdy gördüm.

Bardym hezzetli jaýlara,
Hezzeti dönmüş waýlara;
Günüm öwrülip aýlara,
Hezzet ýurtdan turdy gördüm.

Ne gowgalar bar başymda –
Gargalar gyrat läşimde;
Bagyryşyp Baleýşemde,
Tasaýan nerleri gördüm.

Gezdim gyryň eteginde,
Ýatdym gumuň oýtagynda;
Ner-maýanyň ýatagynda
Mesgen tutan gurdy gördüm.

Hakyň emri beýle bolup,
Kapyr bize zulum salyp,
Öýi ýykylyp, özi ölüp,
Ýas tutýan pederin gördüm.

Duşman üstüne baranda,
Zarba-zarp gazap salanda,
Naçarlar ýaşyn sylanda,
Goç ýigidi görde gördüm.

Belent-belent baýra çykyp,
Delmunyp, dört ýana bakyp,
Didämden ganly ýaş döküp,
Jesedimde gerdi gördüm.

Hany nerler, hany sirler?
Hany ärler, hany pirler?
Agyr döwlet, ulug iller
Gark eden girdaby gördüm.

Asmanda galmandyr perde,
Gözel iller galdy derde;
Ol Dählide, Däligyrda
Läş serilen ýurdy gördüm.

Men bardym Okly, Sözene,
Gözüm çydamaz tozana;
Nälet bolsun il bozana –
Il bozan namardy gördüm.

Aman aýdar, jana azar:
Jesetlerde gurt-guş bazar;
Habar alsaň, molla Nazar,
Dert üstüne derdi gördüm. Goşgular