Bes! — diýýär
Bes! — diýýär
Ýer şarynyň ähli sada ynsany,
Jellat, çek eliňi, indi bes! — diýýär.
Gul etmek başartmaz saňa Liwany,
Eglenme-de öz ýurduňa ös! — diýýär.
Aýagyna gandal uraýar ýaly,
Yzladyp mal kimin süräýer ýaly,
Öz erkini saňa beräýer ýaly,
Araplaryň senden nirsi pes! — diýýär.
Näme üçin men ýagty dünýä geldim — diýp,
Açylmadyk gunça ýaly soldum — diýp,
Eý waý, eje, waý, ejejan, öldüm — diýp,
Eşdilmesin dat-perýatly ses — diýýär.
Bet hyýally, jellat, her ýan urunýaň,
Ýaragyňy gezäp nirä sürünýäň?
Näme özgäň mekanynda görünýäň?
Baýlygyň aşygy sen näkes! — diýýär.
Zemzen ýaly haýbat atyp çişme-de,
Agzyňdan ot sowup öňe süýşme-de,
Beýdip, jenap, oda-köze düşmede,
Ganly ädigiňi yza bas! — diýýär.
Baýram JÜTDIÝEW.
«Edebiýat we sungat» gazeti, 1958 ý. Goşgular
