Amatly gün (tymsal)

Günlerde bir gün talyplar mugallymdan:

— Täze bir işe başlamak üçin haýsy gün has amatly? — diýip sorapdyrlar.

Mugallym:

— Elbetde, men beýle güni bilýärin. Ol gün çarşenbedir — diýip, jogap beripdir.

Talyplar dessine galamlaryny ellerine alyp, mugallymyň aýdýanlaryny ýazmaga başlapdyrlar. Olaryň diňe birisi hiç zat ýazman oturansoň, mugallym onuň bolşuna geňirgenip:

— Sen näme üçin ýazmaýarsyň? — diýip sorapdyr.

Şonda ol talyp:

— Ussadym, men siziň indiki aýtjak bolýan zadyňyzy bilýändigim üçin ýazamok — diýipdir.

— Meniň näme aýtjagymy bilýärsiňmi? Ol näme bolup biler? — diýip, mugallym agraslyk bilen sorapdyr.

— Ol soňra penşenbe, anna, şenbe, ýekşenbe, duşenbe we sişenbe günleri.

Beýleki talyplar ýerliksiz jogap berendir öýdüp, oňa gahar bilen seredipdirler.

— Ýok, men beýle jogap bermezdim. Men şenbe gününden başlap sanardym — diýip, halypa gaharly aýdypdyr-da, bir salymdan hem ýylgyrypdyr. Şonda talyplar mugallymyň ýalandan gaharlanandygyna, batyrgaý talybyň bolsa mamladygyna göz ýetirseler-de, başky sowalyny ýene-de gaýtalapdyrlar:

— Mugallym, täze işe başlamak üçin haýsy günüň amatlydygyny anygrak aýdaýsaňyz?!

Mugallym uludan demini alyp, hiç zat ýazman oturan okuwça baş atýar. Ol bolsa:

— Diňe bir gün, ol hem şu gün — diýip, ynamly jogap beripdir.

* * *

Söýgi we gahar

Günlerde bir gün halypa talyplaryna ýüzlenip:

— Näme üçin adamlar gaharlananlarynda sesine bat berýärler? — diýip sorapdyr. Şonda talyplaryň biri:

— Sebäbi olar rahatlygyny ýitirýärler, rahatlygyny ýitiren adamyň hem gahary gelýär — diýip, jogap berýär.

Onda halypa:

— Eger-de gaharyň gelse, hökman gygyrmalymy? — diýip, ýene sowal bilen ýüzlenýär.

Talyplar dürli jogaplary berýärler, ýöne olaryň hiç birisi halypany kanagatlandyrmaýar. Bir salymdan ol:

— Haçanda adamlar öýkeleşseler, gaharlary oýanýar-da, ýürekleri biri-birinden daşlaşdyrýar. Şoňa görä, seslerini ýürege ýetirmek üçin olar gygyrmaly bolýarlar. Munuň tersine, sarpaly-sylagly adamlaryň ýürekleri ýakyn bolýar. Onsoň, olarda gygyrmak zerurlygy döremeýär, pessaýja ses bilen gürleseler-de, gowy düşünişýärler. Bu ýagdaý aşyk-magşuklarda has-da äşgär duýulýar, olaryň birek-birege söýgüsi, mähri juda ýokary bolansoň, ýürekleri-de biri-birine has golaý bolýar. Şonuň üçin, olar ýuwaşja pyşyrdaşyp, hatda hiç hili gürlemezden, ýöne nazarlary bilen-de düşünişip bilýärler — diýip, sesiň gatalmagynyň sebäbini düşündiripdir.