Ak buýnuzly ak maral

Ak buýnuzly ak maral AK BUÝNUZLY AK MARAL

Atyp gelýän daña salam berýän deý,
Dag maraly daga çykdy ir bilen.
Awçy ýigdem geýip şypyrmasyny
Haýdap barýar şo-ol marally kemere,
Garpyşjak deý dag peleñi — Şir bilen.

O käte ýapyrlyp, kä emedekläp,
Käte ýylan kimin süýşüp barýardy.
Öz ýanyna geçirip tez maraly,
Arzuwlañ tanapyn iýşip barýardy.

Çeşmä ýetip gelýän käkilik sürsem
Bu awçyñ niýetin añan dek ylla.
Owazdan dolduryp gülli deräni
Gaçdylar: Belet biz diýýän dek güllä!

O betniýet welin ýaplandy daşa,
Dagyñ tez maralny alyp nyşana.
Ah, — maral,
Ak maral, gir gür jeññele,
Şam bolýarsyñ ýogsa o betnyşana!..

Ne meniñ sesimi eşitdi maral,
Ne-de duýgurlygy ýetdi dadyna.
Ýaman ýeri ýanyndaky owlaklar
Köýäýmeli boldy käbäñ oduna.

Görgür göreçleri gapylan maral,
Ýene awça bakyp gerindi telim.
Onýança-da ony ýere çüýledi,
Daglary lerzana getiren ölüm.

Göwnüme dag-dere doñup bu hala,
Meñem ýüregimi çirkizdi oda.
Zähresi ýarlara gelen körpeleñ
Hersi bir top arça sümdi şo bada.

…Heý-de, körpeleriñ beýle ahwalyn
Görmekden ýaman zat barmy dünýäde!?

Anna GURTGELDIÝEW.

«Ýaş kommunist» gazeti, 1973 ý. Goşgular