Gyzlaryma
Gyzlaryma
Dört gyzym, dört nury didäm,
Gulak goýuñ sözlerime:
Dört ogul deý, dört iner deý
Kuwwat berdiñ dyzlaryma.
Biriñ ýazym, biriñ arzym,
Abadym, säherim meniñ.
Dört diregim, dört pasylym,
Baryñam baharym meniñ.
Dört pasylym, dört diregim,
Gündiz günüm, gije aýym.
Size giñ dünýede abraý
Miýesser etsin ylaýym.
Namartlar kä mert ýigde-de
Nähak ýere şyltak atar.
Ýöne welin, gyz halkyna
Olañ sözi has köp ýeter.
Emma, biliñ, buýsançlylañ
Utdurany ýokdur heniz.
Lak atylar ýeñleslere,
Hormatlydyr edaly gyz.
Durmuş guruñ, ylalaşyñ,
Ýöne ara düşen söze
Orun berip köñlümizde,
Dyzap durmañ öýüñize.
Ýigit kimin, bir är kimin
Iliñ-günüñ hoşy boluñ.
Adyñyz-abraýyñyz bilen
Bir hataryñ başy boluñ.
Oguldan ýanyp ýörenler,
Çeke-çeke ahy-zary,
Diýsin sizi ýüze sylyp:
»Wah, gyz dogsa bolmaýarmy!»
Yhlas bilen dileýärin
Ýüze sylyp günüm-aýym,
Size giñ dünýede abraý
Miýesser etsin ylaýym!
* * *
Giderin, giderin,
Uzakdyr ýollar,
Söýerin. Işlärin.
Aglap-gülerin.
Kim men? Näme
Gadym dünýäñ ýüzünde?
Men bulary ölemden soñ bilerin.
Aýagymy düzdüm döwrüñ aýagna,
Sesine ses goşdum beýik döwrümiñ.
Bir aladam: näçe sahap bolarka
»Saýlanan günleri»
Ýaşan ömrümiñ?
■ MEN ÖZÜMI AÝAMADYM HIÇ ÝERDE…
Men özümi aýamadym hiç ýerde,
Gaýgyda, hesretde, şatlykly günde.
Aglamda geñ galdy terkidünýäler,
Bagtlylar geñ galyp bakdy gülemde.
Söýemde şeýle bir ýürekden söýdüm,
Onuñ bir öýjügnem boş goýmadym men.
Adam söýsem, kimligine garaman,
Söýdüm üstünligi, ýetmezi bilen.
Maña bolsa: »Beýdip ýörme» diýdiler,
»Seniñ bu bolşuña diýerler tentek.
Sen entek ýaş ahyr, saña gor gerek,
Seniñ bar geljegiñ öñüñde entek.»
Men özümi aýamadym hiç ýerde,
Gorum gutarar diýp etmedim müýni.
Kä söýenim üçin urdular meni,
Kä gazabym üçin söýdüler meni.
Haýyr işler üçin taýýarlyk boldum,
Şer işiñ tersinde goýdum men şeri.
Soñ görüp otursam, gutarýar eken
Diñe berilmeýän zatlaryñ gory.
Diñe söýmeýänleñ, köýmeýänleriñ
Özgäni beýgeltjek ajaýyp syry
Bir gyzyl manat deý gizleýänleriñ
Gutarýar ekeni ýürekde gory.
Men özümi aýamadym hiç ýerde,
Özümi bagş etdim özgeler üçin.
Dogry, käte azar berýär ýüregim,
Oñam başga zatdan bolmagy mümkin.
■ RAZY
Ynsana bagt üçin nämeler gerek?
At gerek, ýol gerek hoş hyýal bilen.
Her goşgymda kämil bolmaga derek,
Onuñ barha kyn düşýänne razy men.
Razy ㅡ çynym bilen sadany söýýän,
Razy ㅡ halal saçagymda çöregim.
Razy ㅡ çalarypdyr saçlarym eýýäm,
Razy ㅡ hernä üýtgemändir ýüregim.
Razy ㅡ günler ýüpek söwsana döndi,
Razy ㅡ ýüregimde özgäñ agysy.
Razy ㅡ »Mydam Güneş bolsuna» doldy
Asman bilen şu zeminiñ arasy.
Razy ㅡ köp büdredim çaga mysaly,
Ýalñyşdym, ökündim ilkibadalar.
Şonda gökden inen perişde ýaly,
Duşdy maña oñat-oñat adamlar.
Razy ㅡ köçelerim, ýüregim ýagty,
Razy ㅡ kükregimde diñenok owaz.
Berdi maña bir ömürlik bu bagty
Geçip barýan ýaşlyk, geçip barýan ýaz.
Razy ㅡ joşdum topragymyñ toýunda,
Duzuny syladym, sowuşdym ýasyn.
Eziz maña şu topragyñ goýnunda
Wysal bolan hem bolmadyk yhlasym.
Gerekli pursadym indim äleme,
Begendim, söýüldim, çekdim men zary.
Ine, şu zatlaryñ meniñ täleýme
Miýesser edenne müñde bir razy. Goşgular
