Topragyñ ysy
Topragyñ ysy
Señ bilen paýlaşsam egsildi gussam,
Elmydama senden tapdym teselli.
Çyrpynyp-çyrpynyp bahar gelende,
Derde derman bolduñ, derdim peseldi.
Giñ asmanda turuzanda zenzele,
Otly gylyç bulutlary saýgylap.
Seniñ bilen kalbym açyp syrlaşdym,
Sazaklaryñ pena edip, saýalap.
Ýaşalan günleriñ aladalaryny,
Gerdenimde çekdim,
Gördüm eşretin.
Özgelerden agtarmadym günäsin
Ünjülermiñ ýürekdäki hesretiñ.
Huzuryñda müýnüm duýsam kiçeldim,
Päklik ahyr bu durmuşyñ sakasy.
Geçen Gün däl, ömrüñ manysy bilen
Kesgitlenermiş ynsan bahasy.
Göwni hoş,
Käte boş geçen günlermiñ,
Ömür kitabyny sahapma-sahap
Açýan, eziz toprak, alnyñda seniñ
Ýatlamalar juda kändir bihasap.
Ýaşap ýörün bu jahanda yzarlap,
Saña siñen yhlaslaryñ yzyny.
Öz-özümden razy bolup buýsanýan,
Duýdum seniñ mähir siñen ysyñy.
* * *
Baharyña muşdak boluşym deýin,
Garly gyş säherem özüñe çekdiñ.
Burjy baglan ak sazaklañ suratyn
Diñe şygyr bilen kagyza çekdim.
Ak çägänin ak garynda yz goýup,
Ýöredim, diýdiler: «gitme sowukdyr.
Güneş, gör, kimlerden edipdir kine,
Belki, şonuñ üçin ýüzün sowupdyr».
Säher päkligiñe päkligiñ garyp,
Aýaz ýere buzly zerin çaýypdyr.
Towşanlañ yzyny ýygnamandyr gar
Olar täsin ýoda bolup galypdyr.
Depeler uklapdyr garly ýorganda,
Sazaklaram hüwdüleýär daña deñ.
Sähram, seniñ gara çümen keşbiñi,
Ýadaw ula giden enä deñedim.
Ýüzümde eredip gar uçganagyn,
Bagra basdym bu sähranyñ yhlasyn.
Ýylatdym demime sazak pürlerin,
Hem diñledim gargalaryñ gowgasyn.
Baharyña muşdak boluşym deýin,
Bu garly gyşda-da özüñe çekdiñ.
Burjy baglan ak sazaklañ suratyn
Diñe şygyr bilen ýüregme çekdim.
Miwe TUWAKBAÝEWA. Goşgular
