Paganini
Paganini
«Ýagşynyñ gadry il bilmez,
Ýagşy uzakda bellidir».
Magtymguly.
Maestro Paganini,
Sen adammy,
Ýa-da jynmy?!
Ýeke tarda
Gyjagyñy
Agladyp bileniñ çynmy?!
Çynmy göriplikden ýaña
Tarlaryñy gyranlary?!
Çynmy saña
Dindarlaryñ
Kän muşakgat berenleri?!
Çynmy ähli at-tituly,
Baýraklary ret edeniñ?!
Korolyñ çakylygyna
Gitmän, meýhana gideniñ?!
«Meniñ pirim pişik!» diýip
Pişige uýanyñ çynmy?!
Napoleonyñ iki sany
Uýasyn söýeniñ çynmy?!
Çynmy söýen gyzlaryñy,
Jadylap, telbe edeniñ?!
Çynmy çalan sazlaryñy,
O dünýä alyp gideniñ?!
Çynmy nota geçirmäniñ,
Özgeler ogurlap öýdüp?!
«Jynyñ» ýazan sazlaryny
Ynsan eşitmezmi gaýdyp?!
Buthananyñ öleniñsoñ,
Kyrk ýyl jaýlatmany çynmy?!
…Maestro Paganini,
Sen beýik adammy, jynmy?!
_______________________
* Nikolo Paganini (1782-1840) — belli italýan gyjakçysy, kompozitor.
Hemra ŞIROW. Goşgular
