Nesibäñ çeker
Nesibäñ çeker
Dowamyña çirk gelmese nesliñden,
Ojagyña döwlet arygy akar.
Her ädimde many alsañ aslyñdan,
Ykbal saña mydam ýylgyryp bakar.
Dady bir başgadyr halal gazanjyñ,
Rahat ýat, tur — bolmaz asyl-ha ünjiñ,
Yranmaz-ynjamaz hazyna-genjiñ,
Diñe şowlulykda señ bijäñ çykar.
Gaýgyrma dostuñdan hany-manyñy,
Özüñe ýar tutgul din-imanyñy.
Şonda ýaşan ömrüñ bolar manyly,
Rysgal çeşmesine nesibäñ çeker.
Ýüregiñ suwly bor — syla goñşyñy,
Bagtyñ çüwse, pespäl eýle başyñy,
Bahyldanam gysganmagyl aşyñy,
Bu göreşdir — mertlik pesleri ýykar.
Näzik, senem meñzejek bol oñada,
Ynan ykbalyñy diñe döwede,
Juda köp zat berilýändir sowada,
Oka, öwren, bir gün bagt gülüp bakar.
Näzik ANNATYÝEWA. Goşgular
