Aga-inisiz agy
Aga-inisiz agy
Ençe uýa dogandylar,
Aga-inisizdi bular.
Oglan jigi höwes edip,
Delmuryp, gözlerin ezip,
Kemsinip gezip,
Ahyrynda ulaldylar.
Bu günem ene boldular.
Ine, uýalaň biriniň,
Howlusynda toý-tomaşa.
Gyzyn çykarýar durmuşa.
Gelnalyja ýol açyldy,
Gyza-da kürte atyldy.
Sesi geldi beýemçiniň:
“Bu-da daýysynyň paýy,
Daýy donun alsyn daýy!”
Ah, toýy toýlanýan gyzyň,
Daýysyz-a şor maňlaýy.
Öňden gözi ýaşly ene,
Saklanyp bilmedi, ýene.
Öz gardaşsyz ösenligne,
Çagaň kemsinenligine,
Günäsiz ýere özüni,
Günäkär duýup, hamsygyp,
Birden damagy dykyldy,
Alma ýaly gözlerinden,
Boýur-boýur ýaş döküldi.
2024 y. Goşgular
