Arassadyr
Arassadyr
Serimde dumanym bardyr,
Dumanym arassadyr.
Göwnümde gümanym bardyr,
Gümanym arassadyr.
Ýollarda eglenendirin,
Dost ýumşuna gidendirin.
Bähbidi diýip edendirin,
Zyýanym arassadyr.
Ynsan ömri büklem-büklem,
Egnim, haýyr işden ýüklen!
Orta ýolda bormyň ýyklan?!
Sowalym arassadyr.
Günler ömrüň damarlary,
Kä gamly, kä dabaraly.
Habar soraň, jogap alyň,
Zybanym arassadyr.
Bir söz aýdaýyn kasam deý,
Öwünmek islemesem-de,
Niçik arzuw beslesem-de,
Hyýalym arassadyr.
Bir gez galsam dostlar içre,
Bir köz bolsam otlar içre,
Goşuljak oňatlar içre,
Dowamym arassadyr.
Rejepgeldi MEJIKOW, Goşgular
