Gyzyñ göwni — gyzyl gül
Gyzyñ göwni — gyzyl gül
Dolup akýan derýa—gyzyň hyýaly,
Saklap başarmasaň, akar-da gider.
Ýeser öwsen çagy yşkyň şemaly,
Gaýygyň sal kimin ýykar-da gider.
Bilip goý, gyz göwni, gyzyň hyýaly
Düýbi merjene baý bir deňiz ýaly.
Söýseň şek-şübhesiz, bolsaň wepaly,
Lagly-göwherlerin dakar-da gider.
Gyz göwnünde beýik daglaň zynaty,
Haýbatyny zemin, asman synady.
Köňlünde bolmasa bürgüt ganaty,
Käte gyýa-gyýa bakar-da gider.
Gyzyň göwni gyzyl gülüň dänesi,
Gülün taryplaýar bilbil namasy.
Kükregiňde bolsa bahar nagmasy,
Güller gunçalanyp çykar-da gider.
Gyzyň göwni—yssy günüň çoglary,
Nur berer, köýdürer gyzan çaglary.
Sähel başgalasaň söýgiň ýollaryn,
Aýralyk oduna ýakar-da gider.
Ybraýym ÝUSUP. Goşgular
