Gorkýan
Gorkýan
Aýdan sözlerimi saňa
Geň görersiň öýdüp gorkýan.
Soň meni bir kelesaňa
Deň görersiň öýdüp gorkýan.
Gam çekip, hamsygyp birden,
Horlanýaryn hyrydardan.
Kemçiligmi hemmelerden
Öň görersiň öýdüp gorkýan.
Ýollaryňa garaýarkam,
Umytlarmy üwreýärkäm,
Hoş sözüňe ereýärkäm
Doň görersiň öýdüp gorkýan.
“Söýgi” diýilýän daragtyň
Bersin saýalamak bagtyn.
Şatlygy görmeli wagtyň
Gam görersiň öýdüp gorkýan.
Söýgimiň odunda şunça
Garalsam-da — gara tüňçe.
Meniň bardygmy özüňçe
Soň görersiň öýdüp gorkýan.
Ýeňen barmy ýeserlikden,
Kösenen kän kesirlikden.
Bir gün … ýekesiremekden
Möňňürersiň öýdüp gorkýan.
Gurbanýaz DAŞGYNOW. Goşgular
