Salawmaleýkim
Salawmaleýkim
Säherdir turýan wagtym,
Turdum-da çyra ýakdym.
Çykdym, asmana bakdym,
Asman, salawmaleýkim!
Çaşan daşy daşynda,
Lemmer bulut başynda,
Bilmen näçe ýaşynda,
Daglar, salawmaleýkim!
Tomsuñ ýaşyl galasy,
Janly-jandar penasy,
Guş diliniñ senasy,
Baglar, salawmaleýkim!
Beýik-peslere uçran,
Arkasyna ýag syçran,
Ugry wysal ýa hijran,
Ýollar, salawmaleýkim!
Göwnümde ýokdur güman,
Açyldy gowy zaman,
Ördüñizmi sag-aman,
Iller, salawmaleýkim!
Garañky gözden gaýyp,
Gün dogdy altyn çaýyp,
Töwerek-daş ajaýyp,
Dünýä, salawmaleýkim!
Ýusup HAÝYDOW. Goşgular
