Ökünmäýin
Ökünmäýin
Arassaja eşigimi,
Ýamap geýsem deşigini.
Bir namardyň işigini,
Kakanyma ökünmäýin.
Dileginde sag başymyň,
Dostdan gurşalgy daşymyň,
Şatlygymdan göz ýaşymyň,
Akanyna ökünmäýin.
Käte-käte setir ýazyp,
Ony hem süzgüçden süzüp,
Bir kiçijek şygyr düzüp,
Okanymda sakynmaýyn.
Ýagşylykda bolsa adym.
Gowşatmasyn meniň badym.
Özgäň gazanan şöhratyn,
Men döşüme dakynmaýyn.
Giňlik sal meniň göwnüme,
Agram salsaňda egnime.
Degmäýin men dost göwnüne,
Duşmanymdan çekinmäýin.
Myhman kaksa işigimi,
Men ýumşatsam düşegini.
Bir maşgalaň keşigini,
Çekenime ökünmäýin.
Birden başa gelse ölüm,
Bagrym bolsa dilim-dilim.
Pursat bolsa ýeke salym,
Dert öňünde epilmäýin.
Azat NURGELDIÝEW. Goşgular
