“Çelsi”, “Fiorentina”, “Betis” hem-de 2 polýak kluby çärýek finala çykdy
“Çelsi”, “Fiorentina”, “Betis” hem-de 2 polýak kluby çärýek finala çykdy
UEFA Konferensiýa Ligasynda-da 1/8 finalyň jogap duşuşyklary geçirildi we çärýek finalçylaryň ählisi belli boldy.
“Çelsi” öz meýdançasynda “Kopengageni” Dewsbýuri-Holluň 55-nji minutdaky owadan goly bilen 1-0 hasabynda utup, çärýek finala çykdy.
Soňky 2 ýaryşyň finalyňda utulan “Fiorentina” öz meýdançasynda “Panatinaikosy” 3-1 hasabynda ýeňdi. Italýan klubuna ýeňiş getiren gollary Mandragora, Gudmundsson hem-de Ken geçirdi. “Fiorentina” 1-nji oýunda 3-2 hasabynda utulypdy.
Öz meýdançasynda “Witoriýa” bilen deňme-deň oýnan “Betis” Portugaliýada garşydaşynyň derwezesinden jogapsyz 4 gol geçirdi. Gollary Bakambu (2), Antoni hem-de Isko öz atlaryna ýazdyrdylar.
Polşanyň çempiony “Ýagelloniýa Belostok” öz meýdançasynda “Serkl Brýuggeni” 3-0 hasabynda ýeňipdi. Jogap duşuşygynda tasdanam brýuggeliler umumy hasaby deňläpdi. Duşuşykda ýer eýeleri 2-0 hasabynda ýeňiş gazandy, ýöne bu olara ýeterlik bolmady.
2 oýunda 10 gol geçirildi
Tapgyryň iň çekeleşikli duşuşygy Şweýsariýada oýnaldy. “Lugano” topary Sloweniýanyň “Selýe” toparyndan 1-nji oýunda 1-0 utulypdy. Jogap duşuşygynda 9 gol geçirilip, “Lugano” topary 5-4 üstün çykdy Myhmanlar esasy wagtyň ahyrynda, has takygy 90+5-nji minutda penalti goly bilen aratapawudy 1 gola düşürip, ýaryşda galdy. (Mahmud 21, Kutsias 42, 80, Dos Santos 44, Dumbiýa 118 – Şeslar 40, Swetlin 68, Kuçyş 90+5 p, Nieto 97). 2 oýnuň netijesi boýunça 5-5 tamamlanan duşuşygyň soňundaky penalti urgularynda-da ispaniýaly Albert Rieranyň tälimçiligindäki “Selýe” topary 3-1 hasabynda öňe saýlanyp, çärýek finala çykdy.
Öz meýdançasynda “Legiýany” 3-2 ýeňen “Molde” myhmançylykda goşmaça wagtda 2-0 hasabynda utulyp, ýaryş bilen hoşlaşdy.
Şwesiýanyň “Ýurgorden” topary öz meýdançasynda Kipriň “Pafos” toparyny 3-0 utdy. Olar 1-nji oýunda 1-0 ýeňlipdi.
Bosniýada deňme-deň oýnan “Rapid Wena” bilen “Boras Banýa Luka” jogap oýnunda Awstriýada duşuşdy. Bu oýunda wenalylar goşmaça wagtda 2-1 hasabynda ýeňiş gazanyp, çärýek finala adyny ýazdyrdy.
Çeşme: zamanturkmenistan.com.tm